Լքված տուն

Ես լքված տուն եմ՝

Անդուռ, անլուսամուտ,

Քամիներ են մեջս

Ու պատերս են մամուռ

Ես լքված տուն եմ

Սարի գլխին հեռու

Ինձ գտնելու համար

Շատ ջանք է պետք գալու

Ես լքված տուն եմ

Ու այստեղ միջանցիկ քամիները

Սերեր են երգում

Իմ անտերության ֆոնին:

***

Ես շուտով

Կմեռնեմ

Գուցե

Հենց այսօր

Կամ էլ

Հենց հիմա։

Կոպերիս

Տակ սահման

Չի մնա

Ու լուսաբացը

Կլինի լոկ հիշողություն:

Էլ մի շտապիր

Ինձ չտեսնել,

Էլ մի շտապիր

Չսիրել։

Մի օր մարդիկ

Կտրորեն հողը խոնավ,

Ու չեն իմանա,

Որ սիրտ է եղել՝

Տրորված մի սիրտ,

Նախքան հող դառնալը։

Մի օր կմեռնեմ

Այսօր

Եթե ընկել ես

Վեր կաց

Տես լուսինը կախվել է

Ամպից ցած:

Եթե ընկեր ես

Կմնաս հետս

Երբ

Ցուրտ է ու թաց:

Մենք կորցրել ենք

Կորցրել ենք մեզ

Ցերեկը,

Ու իզուր

Իզուր ենք

Փորձում գտնել գիշերով։

Մենք այնքան ճիշտ ենք

Ապրում

Որ մեռնում ենք մենակ

Մեռնում ենք

Վերջում:

Վերջում:

Լսիր ընկերս

Գուցե ճիշտը

Սխալվելն էր

Ու ուղղակի ապրելը։

Առանց ֆիլտրի

Առանց պատրանքի

Որ պետք է փրկել աշխարհը

Որ պետք է լինել

Գեղեցիկն` ամենա

Ու հարուստը:

Գուցե քեզ

Չերջանկացնի փողը

Ու խելքահան անի

Հայրենի սարն ու ձորը։

Լսիր ընկերս

Եթե ընկել ես

Միշտ կտեսնես ձեռքս

Որ կքաշի քեզ վեր:

Կամ կիջնի մոտդ

Դեմքս

Որ ծիծաղենք

Անդունդից

Թե էս ինչ

Հեշտ բան էր

Գլորվելը ձորից

Ու վեր բարձրանալը

Նորից:

Մենք կորցրել ենք մեզ

Ու ուզում ենք

Որ գտնի ուրիշը

Նա հանի մեր մատի

Փուշը

Ու թողնի հանգիստ:

Հանգիստ:

Հանգիստ:

Մի դատիր այդքան խիստ

Առաջին անգամ ես ապրում

էս կյանքը:

Կամ չես հիշում անցածը

Ուղակի եթե ընկել ես

Վեր կաց:

Եթե ընկել եմ

Մնա մոտս

Եթե ընկերս ես:

Սխալվելը

Մեղք չէ

Մեղք է չապրելը էս կյանքը։

***

Ի վերջո, մեզ լքում են բոլորը.

Կարևոր է, որ դրանից հետո

Մենք դեպի մեզ դառնանք

Չգնանք օտար հանդերում

Մոլոր ու գլխիկոր ման գանք

Խոտակեր կամ խոտ դառնանք:

Ի վերջո, մինչև այդ

Մենք էլ ենք լքել

Նրանց

Նրան...

Նա հավատում էր, որ կդառնանք տուն

Տուն, սիրտ, բույն,

Իսկ մեզ այլ փայլփլուն մի գույն

Տարավ:

Հունով ծուռ... խավար

Բոլորը լքում են բոլորին

Ես այստեղ եմ

Ու էլ չեմ սպասում քեզ

Սեր:

Շուշանիկ Գյոլչանյան