Նոբույուկի Ցուջիի. հպվելով հնչյունին
Ճապոնացի դաշնակահարի առաջին մենահամերգը Երևանում
Իր առաջին երևանյան մենահամերգով Արամ Խաչատրյան համերգասրահում հանդես եկավ ճապոնացի վիրտուոզ դաշնակահար Նոբույուկի Ցուջիին` բացելով «Երևանյան հեռանկարներ» 20-րդ միջազգային երաժշտական փառատոնի աշնանային համերգաշրջանը:
Ի ծնե տեսողության խնդիր ունեցող Նոբույուկիի առաջին հայաստանյան այցը հաճելի պատահականության արդյունք է, երբ նրա խիստ հագեցած երաժշտական օրակարգում սեպտեմբերի միակ ազատ օրը հատկացվեց երևանյան համերգին: Իսկ համերգային ծրագիրը հայ հանդիսատեսի համար ինքը՝ Նոբույուկին է կազմել` իր սիրելի երեք կոմպոզիտորների ստեղծագործություններից` Ֆրեդերիկ Շոպեն, Կլոդ Դեբյուսի և Մորիս Ռավել:
Նրա կարիերայի համար հատկապես վճռորոշ է եղել 2009 թվականին Վեն Քլայբրնի դաշնակահարների միջազգային մրցույթում նվաճած ոսկե մեդալը, որից հետո դաշնակահարը հայտնի դարձավ ամբողջ աշխարհում: Սակայն ինքը` Նոբույուկին, ճակատագրական է համարում երկու տարեկանում իր մայրիկից նվեր ստացած խաղալիք դաշնամուրը, որը սկզբում պարզապես նվագել է խաղալու համար, սակայն արդեն չորս տարեկանում դրանով կարողացել է մեղեդիներ հնչեցնել:
Իր և երաժշտության կապի մասին խոսելիս Նոբույուկին ասում է, որ իր մտքում մշտապես հնչող երաժշտություն կա:
Փառատոնի կազմակերպիչների հետ Նոբույուկիին ծանոթացրել է Վալերի Գերգիևը: Ապա, ինչպես փառատոնի գլխավոր մենեջեր Սոնա Հովհաննիսյանն է նշում, Նոբույուկիին անմիջապես մասնակցության հրավեր է ուղարկվել Երևանից:
«Երբ ստացա հրավերը, Հայաստանի մասին շատ բան չգիտեի, բայց երբ Հայաստան եկա, զգացի, որ մարդիկ չափազանց ջերմ են, և ցանկանում եմ նրանց շնորհակալություն հայտնել` լավ երաժշտություն պարգևելով»,- ասաց երաժիշտը համերգից առաջ:
Նոբույուկիին Արամ Խաչատրյան համերգասրահը դիմավորեց լեփ- լեցուն դահլիճով ու չմարող ծափահարություններով: Դժվար է հաշվել թե քանի անգամ Նոբույուկին հեռացավ ու կրկին վերադարձավ բեմ՝ չդադարող ծափահարությունների ներքո: Համերգային ծրագրի ավարտից հետո նա հայ երաժշտասերների համար կատարեց ևս երեք ստեղծագործություն՝ ամեն անգամ անարձագանք չթողնելով ջերմ օվացիաները: Բայց հանդիսատեսը հրաժարվում էր հեռանալ դահլիճից: Հատկապես տպավորիչ էր Ֆերենց Լիստի «La Campanella»-ն:
Երրորդ ստեղծագործությունը կատարելուց հետո Նոբույուկին ձեռքի մեղմ շարժումով փակեց ռոյալի ստեղները և լուսավոր ժպիտով հեռացավ՝ դեռ երկար հնչող ծափողջույնների ներքո:
